话到崇明元宵节个吃，上子年纪个人十个里八个话茧团银子。革是用米粉做成蚕茧、银饼个样子，属于岛浪厢正月半个传统美食。
农历正月十三四里，乡下人城里人都开始做茧团银子，拿糯米粉挽勒面盆或者小缸里，加糖、热水拌、搓，直到粉团变勒韧笃笃又勿答手。
崇明个村姑村妇，做茧团银子都是老门槛，揪一小个粉团勒手里，一歇歇变成子两头大中间细个茧团，勿多一歇，做子长煞一排。接下来做银子，拿粉团搓成烧饼一样个扁圆形，用酒杯底朝上面揿一记，出现一个圆圈，就成银子特。
还要做稻箩、棉花萝朵、杜米股头，以及鸡鸭众生。稻箩做起来还算便当，搓成宝塔式，底里围圆大点，顶浪小点。棉花萝朵也勿难，样子搓出来后，勒勒上面开四条缝，因为一个萝朵开四囊棉花。做杜米股头繁一点，关键是要看得出一粒粒杜米子，有点吃功夫。
做好子田里长个，再做众生，主要是家畜家禽像鸡啦鸭啦猪啦。小囡也蛮高兴凑闹猛，我也做过个，记得姆妈是做一样像一样，我做子一只鸡一只鸭，自己看看也笑出来，除了嘴巴尖勒扁个区别外，别个看勿出啥勿同。姆妈话，鸭个颈骨要长一点，身体要矮一点，鸡个脚要高一点……我作姿作够重新做，但不过仍然勿像样，鸭颈骨太长太细，头宕到脚跟头要断下来特，鸡个脚一只长一只短，两只眼睛乌子一只高低。
茧团银子一道做好后，搬到烀糕垫浪，再端到镬子里蒸。
小囡晓得有吃个特，候勒灶边头，歇歇问熟勒呒熟，馋唾水直咽，熟子也总抢来先尝尝。我上中学个辰光正是三年困难时期，茧团圆子熟了也话尝尝，饿虎囵吞吃子一只又一只，结果吃脱九只！
烀熟个茧团银子等凉勒筛子里，明天要派大用场嘞——祭拜土地神，上下百沙俗话叫斋田头，就是勒田头祭拜土地神。
《崇明县志》里就是这样记载的：农历正月十五为元宵，下午斋田头。土地生养万物，长五谷养育百姓，传说中个土地神，能保佑本乡本土五谷丰登，六畜兴旺。
崇明向来是农村，吃个着个都要靠地里长出来，种田人希望得到土地神个庇护，种下去保证有得收，还要好收成。故所以对土地神交关敬畏，叫伊土地老爷、田公公，年年正月半勿管好天落雨，总要到田里斋田头，拿茧团银子拨田公公吃，保佑花利长勒好点。
正月半下半天，家家出动斋田头，竹篮里拎着茧团银子，去到自家田里，在田边摆一张矮凳，矮凳浪放一盆茧团银子，请土地公公享用。
有些人家简单点，茧团银子插勒筷头浪，再插勒地里，叫田公公吃。假使是稻田，筷头浪插稻罗，如果种棉花，就插棉花萝朵，种杜米的话，就插杜米股头……
估计田公公已经吃饱了，就跽勒地上唱喏叩头，嘴里触落触落诚诚心心祈祷：“求田公公保佑，让我俚多收点花利，吃勒饱点，着勒好点，多换点铜钿银子……”
上世纪五十年代地皮变子集体，斋田头逐点少见。改革开放了，地皮重新回到户头浪，有汛人家又兴正月半斋田头特。
近年虽然大多数人家勿再斋田头，但正月半吃茧团圆子个传统，镇浪乡下都勒继续。向化镇每年个灶花节浪，都要举行做茧团银子个比赛，男女老少齐上阵，看啥人做勒像，花样多，现场个人多来轧身勿开，哗笑说笑闹热来拗去话伊！