入子夏，崇明岛浪东一摊西一摊芦穄多来交关，勒勒风头里掼来掼去，碧蹦爽青好看破来。外地来的朋友，有个当杜米，有个当高粱，还有个只当是竹园里个青竹头嘞！
《崇明县志》里话，崇明芦穄肉头松脆，汁水多，甜得来像甘蔗，比别拉地长个孩好吃。民国个辰光，就有崇明人到上海去卖芦穄，上海人蛮喜欢吃个，孩话甜来，当年个《图画日报》专门报道过，还配子一首诗，诗里厢话：“崇明芦穄着根甜，嘴里叫卖肩上掮……”
有人要问，崇明芦穄为何革能甜呐？回答革个问题，先脱大家讲一桩真实个事体。
有个农科朋友勒勒湖北工作，当地也有芦穄，就是勿及崇明个甜，心里想，勒勒革面种崇明芦穄看看哪话。一年回乡探亲个辰光，带子一把芦穄籽去，完全照崇明个方法下种籽、拔芦穄秧种，还有浇水、挑草、浇粪、削穑头，一点弗走样。横等竖等芦穄老特，二条头长子好几梯，斫仔一根尝尝，淡咪咪；去田当中爱斫一根，也是淡咪咪。伊有点弗勿相信，第二年爱种，脱旧年一样，就是弗甜。
农科朋友比较两个地方个自然条件，得出原因，是湖北搭子崇明个烂泥质量勿同。
崇明是世界上最大个河口沙岛，由长江上水头冲过来个泥沙屯出来个，革是沙夹黄烂泥，最适宜芦穄个生长，长出来个芦穄就是比别拉地甜。
崇明芦穄长勒能甜，搭子农民伯伯用心照料也大有关系。老早个辰光，夜里厢拎子洋灯出去照蛸蜞，弄勒河深落水，吃力来拗去话夷。照子蛸蜞刹坑，听农科专家讲，蛸蜞粪里多磷质，有处增加瓜果里个糖分，浇勒芦穄浪末芦穄更加甜特。还有，崇明吃着大风个日脚蛮多，风一打芦穄就绵下来特，绵个芦穄甜度要打折头个，故所以看到绵下来个话，连牵一根一根轻轻叫搀直，捞烂泥壅好，一点也呒处马虎个。
崇明乡下头差勿多家家有芦穄种个，房前、屋后、山头边、沟滩头孩是，种勒近末吃出来便当点，大多数自家种自家吃，也有掮出去换铜钿个。还要派别个用场嘞，假使有亲眷朋友来特，主人家连牵拿仔小尖，追到田里去斫芦穄，革就像城里拿糖块水果招待客人。
到上海跑亲眷、斋朋友个崇明人，孩要带点芦穄当礼品，上海人快活来横谢竖谢，话崇明芦穄甜来落，斜气崭。
上世纪六七十年代，廿几万上海知青来子崇明，勒勒八个农场里战天斗地，探亲个辰光，孩要带点芦穄回去，拨勒一家六门、亲眷朋友吃吃。革样子一来，交交关关个上海人吃着子崇明芦穄特，孩晓得崇明芦穄甜来呛口，等于脱崇明芦穄做广告，崇明芦穄个名气更加响来划跃跃。
长江隧桥开通以后，到崇明来孛相个外地人越来越多，一届又届“崇明芦穄节”上，芦穄园里钻子交关游客，孩得力来嘻嘻哈哈斫芦穄，掰芦穄，有滋有味吃芦穄，蛮多人还是第一趟吃着勒，一头吃一头话：“爱唷，崇明芦穄真个甜来呒得话头，根浪甜，梢浪也甜。”